wọ́n ní ilé làá wò ká tóo s’ọmọ lórúkọ—

inú ilé tí ati bí'mọ. àmó ilé tí n ò bá wò

ni ó kún fún egbìrìn ọ̀tẹ̀ yìí—

ilé olórogún—ilé ogun. èmi–jù–ó–

ìwọ–ò–jù–mí, ti sọ ilé ọlá di ahoro.

ilé tí ò bu àpónlé fún ni—ilé tí oriki rẹ̀ ò ṣé mú yangàn.

àwọn ará iwájú ò rò ẹ̀yìn ọ̀la, wọ́n yí orúkọ mọ̀lẹ́bí mẹ́ẹ̀rẹ̀—

imí létí ọpọ́n ifá - àbùkù rèé lára ohun àpónlé.

wọ́n gbàgbé wí pé orúkọ rere, ó dára ju wúrà òun fàdákà lọ.

oníyangí ará iwájú tapo sí ààlà  

àwọn èrò tó n bọ léyìn. orúkọ àpọ́nlé

wá dà ohun a ń ṣáá fún bíi aṣọ ẹlẹ́gbin. 

bí aṣọ ẹ̀sín. nítorípé okùn mọ̀lẹ́í ti já.

nítorípé ilé tí a bá fi itọ́ mọ 

ìrì ni yóò wo. ilé olórogún, ilé ogun.

orogún ń loogun ogun, ọbàkan ń gbómi ìjà k’aná

ilé ṣe bẹ́ẹ̀ ó di ajere — janjaanjan bíi iná ọtíkà.

ẹ sọ fún mi—pẹ̀lú àwọn àkàwé yìí—orúkọ wo ni kín s'ọmọ?

orúkọ rere wo ni n ba s'ọmọ

nígbàtí orísun rẹ̀ bá kún fún kìkì ẹ̀jẹ̀?